Antanssion, sa la pa in zé é souvan défoi bann dirizan k’la vouli aboli sa an mèm tan k’lo pact kolonyal la pèye tré shèr-Ziska sinkant — troi kou d’éta épi plizyèr assassina bann dirijan.

Momandoné i paré Kadhafi li mèm la vouli fé in bank pou l’afrik avèk lo bann rézèrv larzan son péi l’avé. I paré sa la pa porte ali bonèr é la anvoye ali iliko dann péi tanto. Dann tan-la Sarkozy té lo prézidan La franss.

In zour mwin té apré koz avèk in ga konm k’i diré bien a-gosh é zistoman nou la anparl lo fran CFA é li la romète amwin mon plass kan mwin la di ali La franss la kopyé dsu l’modèl lokipassion bann zalman pou pèrmète in léksploitation an koup réglé La franss okipé par l’almagn é bann péi l’afrik par La franss.

Poitan sak mwin téi di sé sak bann Zafrikin i di in pé dann tout péi la zone CFA ; li la pa parti ziska dir amwin La franss lété plin la zénérozité dann l’ède pou bann péi l’Afrik pars la sé mwin k’nora site ali la pozission Chirac k’i dizé lo gagnan la dan sé La franss épi l’Afrik.

Arzout èk sa sirésèrtin si La franss l’avé pa mète an plass in pakt kolonyal épi lo fran CFA li noré té in sinpp puissans moiyène é pa inn grann puissans konm li kroi li lé. Antouléka sé sak plizyèr prézidan konm De Gaulle, Pompidou, Mitterrand, Chirac téi di. Mèm Macron i di sa épi i frène lémanssipassion bann péi l’Afrik ziska ankor koméla.

A bon antandèr salu !

Justin