Oté

Ankor in pti kou d’téléfone siouplé pou bien aprann lé shoz !

Justin / 5 séptanm 2018

JPEG - 43.6 ko

Matant zélida la ékri Justin :
Mon shèr nové, mon spès salté, rouj-de-fon dovann l’étèrnité, si mi konpran bien ala ké ou lé pou lo bann smartfone dann lékol. Sé sak moin la kri konprann kan moin la lir out modékri l’ot zour. An pliské sa, ou lé pou sa, konm in linstrimann travaye. Kan inn i agas l’ot ansanm sa i fé pa ou arien ! Kan i fé l’insolans avèk téléfone, ou i s’anfou.
L’èrla, moin lé sinploman apré domandé si la pa pars in minis la droit la désid sa ké ou lé kont. Dann out tan l’avé poin smartfone lékol ! Dann mon tan l’avé poin non pli ! Si marmaye i vé zoué avèk z’ot téléfone, zot na ka zoué shé zot. Mé siouplé i fo gard lékol konm in l’androi i travaye é na poin tout sort z’afèr pou anpèsh aou bien travayé. Tok ! Pran sa pou toué !

Justin la fé pou répons :
Mon vyé matant k’i koz toultan la boush rouvèr, ou i étone pa moin ditou. Pars ou lé touzour dakor avèk bann tète fromaz i diriz nout lédikastyon nasyonal. Mèm si sé pou ral bann maraye an aryèr, ou lé pour, é i sifi pou sa k’in léstré i désid in n’afèr.
Matant l’ot zour moin la pran lo ka désèrtin zanfan Madégaskar i ansèrv in bonpé z’ot téléfone é mi pans zot na rézon : in sinp pti l’aparèye pli pti an longèr épi an larzèr in sinp tablète shokola, sa i pèrmète azot suiv in pé tout program kisoi kalkil, kisoi la natir, kisoila lang zot i ansèrv, son gramèr, son vokabilèr. An pliské sa zot i pé aprann zoué dame, sansa zéshèk é mi kroi pa in moun va dir amoin sa lé pa bon pou form lo rézoneman, la konsantrasyon étout sak i fé k’in marmye va vni in bon zélèv, épi in bon zétidyan, aprésa in bon téksnisien é akoz pa in bon éspsyalis in pé tout lé shoz : vèrsé dann l’indistri la konésans.
Alé matant i pas spa zanbèk la modèrnité konmsa ! I bar a shomin la konésans konm i vé fé dann lékol fransèz ! Tousa pou an avoir la pé. .. La pé ? sé par l’intérèsman va gingn la pé, pa par l’interdiksyon. La pé ? Dakor par l’ouvèrtir léspri é pa par la fèrmtir.
Tok ! Pran sa pou ou épi pou tout bann tète dozèf i koné rienk interdir, intèrdir, intèdrirolèrk rouvèr léspri, rouvèr ali. Détaké : ala la klé !