Médam, zé méssyé, la sossyété, koz èk mwin sé koz èk in kouyon, mé sé o pyé d’lo mir k’i oi lo masson.

Mézami si ni rod dann bon diksyonèr kossa i vé dir « mate » sansa « maté », ni trouv pa in sanss bien nète . Sé lo mo k’i vien apré k’i done son sanss lo vèrb. Par égzanp si ni di : « méssyé avèk madam la mate in kou » sa i vé dir « bataye la pété rante inn épi l’ote » . Si ni di : « mwin la mate in pyèz pou li », sa i vé dir mwin la prépar in pyèz pou li tonb dodan.

Astèr si mi di « démate » sansa « dématé » dann sanss lo lésprèssyon sa i vé dir, lo kap la dékroshé konm sa i ariv souvan défoi dsi la route-an-kornish sansa la route Salazie é konm zot i koné sa la pa in bon n’afèr. Astèr si ni rovien lo ka méssyé-madam, si ni di zot la « dématé » mi diré zot la kalmé sinploman.

In rapèl : « mate » -infinitif form longue - é « maté » -infinitif, form kourte - i di « mate » kan néna in konpléman konm dann « mate in pyèz » é i di « maté » kan na poin konpléman konm kan i di « banna la maté ».

Alé, mi kite azot rofléshi la dsi é ni rotrouv pli d’van. Sipétadyé.