La boush kabri, an tou tan, sa in n’afèr d’apré l’moun, i port la movèz shans. Poitan nout bann konpatriyot malbar i yèm bien kabri, mèm zot i sakrifyé kabri pou gingn la protéksyon désèrtin Bondyé. Sré plito bèf k’in bonpé rényoné i aprésyé pa pou manjé-arienk pou manjé pars zot i boir d’lé, in tan téi pass la taye bèf dsi lo la tèr damé, épi téi ansèrv la taye bèf konm fimyé… donk bèf néna in bon l’itilité. Mé kabri, sé pa pou kosa, i parétré sa i port la movèz shans sirtou si i amar la boush kabri avèk in moun. Moin pèrsonèlman, mi sousyé pa tro ni pou kabri épi son boush, ni pou koshon, ni pou bèf pars dann mon famiy la pa aprann amoin la pèr tousala. Mé shakinn son kroiyans é mi kite azot pou rofléshi la dsi si zot i oi in l’intéré pou rofléshi la dsi.. Ni artrouv pli d’van. Sipétadyé !