I paré dann in kanpagn zéléksyon, i fé bon pé promès. Zordi i raz kontan mé domin i raz gratuite ! Dann la kanpagn ! Pars apré, i fo oir si i yin bou tyinbo lo promès. Pars kan la kanpagn la fini, i fo komans travay, mé i fo tash moiyin pa arzoute ankor d’ote kalité promès.
Prézidan la Réjyon la fine promète mète dé mil kar déssi la route épi anbosh kat mil pèrsone pou amène lo kar, distribyé douz mil ordinatèr pou bann marmay i sava gran lékol, armète uit milyon l’éro pou ède demoun pran l’aviyon, fé konstrui in gran kantité lojman, in route litoral sis voi, in l’otoroute dépi Sinpir ziska Sinbénoi an passan par la Plène dé Kaf. Yèr, mi sorte antann dir zot i vé fé vnir sisan mil vré touris par an, troi foi plis ké zordi, épi fé anbosh vin mil pèrsone dann travay-la.
I di, souvan-défoi, la lang la poin lo zo, é sa lé vré pou vréman. I di ossi bann promès i angaz aryink sak i kroi, pa sak i promète. I prétan dir in gran zénéral fransé, Zénéral De Gaulle, té i di lo pèp la poin la mémoir. Donk ou i pé di sak ou vé, ou i pé fé sak ou vé, ou i risk pa aryin vi k’demoun, avèk zot mémoir lyèv, va oubliy lo bann promès. Dizon, mé si ou la répète sa matin é soir, tou lé zour, shak zour, dann télé, dann radyo wawa, demoun lé riskab pa oubliyé, épi komans kalkil aou pou sak ou i lé, pou in marshann parol.
Moin, sak mi koné, sé k’in projé, sa in n’afèr i pran lo tan pou mète an route. Défoi dé zan, défoi troi zan, défoi kat, é dmoun lé préssé, é oplis zot lé préssé, oplis konm sèr Ann, zot i oi pa aryin arivé. Ann, ma sèr Ann, né voi ti riyin vénir ?

Justin