Dann tan-la pwinn plass dan la télé, pwinn plass dann la prèss ofissyèl,pwinn plass dann la Rényon ofissyèl osinonsa la mèm plass bann léssé dsi lo bor d’shomin. Révolté par linégalité, par linzistiss, prèss pa d’plass pou la lang kréol La Rényon dann bann média, pa d’plass ditou dann lékol-Konm nou té i di dann tan-la -défandi koz kréol épi krash atèr.Mé toute la plass k’i fo pou rézisté pou sak i vé rézisté.

Anne Chénet l’avé désside rézisté kome ékrivène, kome militante kome fam angajé dan la vi son péi. Lané 1977,el i ékri in roman avèk konm tite « les Muselés » , in plédoiri pou bann léssés pour konte la sossyété. El lé konu galman pou son bann fonnkèr-Matanan é langouti- pou son bann zistoir épi son bann roprézantassion devan in piblik gagné d’avanss.

Dann son roman Les Muselés èl i ékri : « A soir mi koz toussèl dann mon pti boukan. Déor lo van i souf in van d’siklone i sokouye la porte, i rante par bann trou. Tazantan in zanfan i plèr : sirman li la fré. Biensir li lé touni. Toute son linz lé déshiré, konbien foi,mwin la rakomode ali. Astèr lé pi possib..ziska la kouvèrtir lé a trou » -

Mi arète tèr-la pou zordi é biensir mi invite toulmoune pou lir son bann lékritur, lé si tèlman valab toulbon. anne lé parti mé èl la lèss toute son zékri an éritaz lo pèp rényoné.

A bon antandèr salu.