Kissa i lé Anne Mousse ? Son momon té i apèl Marie caze, té marié avèk Jean Mousse, dë malgash té i sort Fort Dauphin. Dë moun-la, l’ariv issi lané 1663 dann l’ékspédission Louis Payen. Kanssa èl lé né ? I koné pa bien. Touléka, èl la batizé lané 1668. I koné pa si son papa lété malgash, Jean Mousse, ou bien zëropéen.
El la marié bonèr avèk Noël Tessier : zot la gingn in gran bout la tèr dann kartyé Sintmari. Anne Mousse la bien travay pou mèt an valèr la tèr, akoz son mari té vyé épï té in pë fay-fay.
Kan son mari lé mor lané 1721, èl la maryé avèk Dominique Ferrère, in boug lavé vintan an moins k’èl. An 1733, èl lé mor son tour. Solman, avan mor,el la fé fèr in pti légliz, la pointe Sintmari.
Kan èl té fine mor, lë shapèl la vnï in paroiss. La fé in simtièr avèk la kïr par koté.
Anne mousse sé in zanfan né dann péi, pétèt lë premyé zanfan né dann péi, mé la pa sïr. Sak lé sïr sé k’èl la gingn in bon pë ti-zanfan.Donkalor, èl i tonm aryèr, aryèr, aryèr granmèr in bon pë dmoun, métiss par l’fèt.

Justin