Fi-t’in tan, bann zanfan natirèl té mal konsidéré, dann z’ot famiy, dann l’androi zot té i arète, lékol, épi byinsir dann partaz lo byin pars zot l’avé poin mèm droi ké bann zanfan té i apèl "lézitime". Mi souvyin mèm inn-dé madam dési la otèr té i apèl azot zanfan lo péshé. Ala pou kossa, na in patoi i di konmsa, kan in moun i an apèrsoi li lé été viktime in l’inzistis, li di : "I pran amoin pou zanfan batar don ?". Dizon, so tan-la la fini. Fini ? Près fini ! Pars, a rogardé pli pré la pa byin révoli pou d’bon… kansréti pou La Rényon.

Mi sorte antann dann radyo, gouvèrnman la déside fé in sipèr-train pou lo projé zot i apèl lo "gran Paris"... gouvèrnman la droite avèk Konsèy réjyonal sosyalis la tonm d’akor la-dsi. Pou zot,oui ! Pou nou, non !
In dalon i sorte anvoy amoin foto in tram… in zoli tram oui !... k’i roul dann in vil. Tram-la sé sète la vil Nice. Son mèr, moin la fine di sé Éstrosi, an mèm tan miniss la rolans indistriyèl… oui ! Moun-la mèm la vni dann la kanpagn zéléksyon, pou di zamé o gran zamé nou nora poin lo larzan i donn toute bann Réjyon i okip lo train…i apèl sa la dotasyon férovyèr.

Arzoute ankor, moin la antann in dalon la di amoin la Martinique nora son tram-train, apopré mèm zafèr ni vé fé issi é in bann i vé anpèsh anou an avoir.
Donk, si mi konpran byin, déssi la késtyonn tram-train, nana ankor zanfan batar, zanfan na poin lo mèm droi ké lé zot. Sé nou Rényoné ! Anou mèm zanfan batar !

Justin