Si zot i ékout bien demoune La Rényon, si mwin té zot, zamé mi anplègn amwin pou in doulèr ; pou in traka, pou in annuiman ninport ékèl. Zot va domann amwin pou kossa é m’aréponn azot :

Si mi di in moune mon zanm i fé mal ; li va réponn amwin son dé zanm i fé mal é ankor pli mal ké la myène. Si mi rakonte in traka, la réponss i vien tousuite pou dir son traka lé ankor pli for k’la myène. Donk i vo myé mi rakonte pa.

Si i di koman mi lé, mi réponn pa pars mi préfèr dir : « si mi di wa konète ! »

Toussa pou dir azot, a bien oir, souvan lé préférab pa rakont son traka, pars si wi vé fèr pityé, wi pèrde out tan… Mé toussa lé vré rant moune a popré bien si lé malad grav, néna d’ote shéma bien antandi pou apliké..

A bon antandèr salu !

Justin