Mi sort antann in moun inportan dann la politik an Frans, di in n’afèr intéréssan. Boug-la i apèl Noël Mamère. Donkalor, li sort di, dann, l’Autriche, si ou i vé fé in kaz, pou ou an avoir lo droi,i fo ou i désid mète inn-dé pano pou kaptir léléktrisité solèr déssi lo toi.
Sa in bon nouvèl sa, mé kansa l’Europ va déside i fo fé parèy partou ? Kansa va obliz bann sosiété i vien dann l’outremèr arienk pou défiskalizé fèr in n’afèr konmsa ? Kansa sar obligatoir pou la Sidr, la Sodiac, la Shlmr épi lé z’ot, fé parèy.
Armète ankor la-dsi in lobligasion mète bann rézèrvoir pou kaptir lo la plui, pou aroz bann plant, kui manzé, lav linz, fé la toilète.
Akoz sak lé possib la-ba dann l’Autriche, i gingn pa fé issi. Akoz issi, i gingn pa fé règleman pou rann sa obligatoir ? Di pa moin nout bann zéli i lès solman bann gro vaza gonf z’ot pla, ramas larzan, épi sak i anprofite pa i débout guète !

Bien sir la pa pou tap dan la tète demoun ! La pa pou goumant loiyé, déza lé shèr konm sé pa koué ! Kontrèr sé pou goumant lo pouvoir d’asha, diminié bann faktir léstrésité épi faktir d’lo. Alé pa rod linpossib, sak mi di la, lé possib ! Anplis mi kroi, sora bon pou dévlop lanploi bann rénioné.

Justin