Si i fé koz bann plantèr déssi zot lavnir, lé pliské sir zot va réponn : lé mol. Pliské mol, nou lé riskab disparète. Si i fé koz bann patron, lé riskab antann lo mèm son : si i protèz pa nout bann prodiksion, nou lé mor. Pétète toulmoun i koz pa konmsa ! Pétète in pé i oi lavnir plis an roz ké lé z’ot. Soman, moin lé sir zordi na poin bonpé, lo kèr lé klèr kan zot i mazine domin.

Alor, kossa nou la parti may anou avèk so késtionn APE (Accords de Partenariat Économique) ? Nout tète la bloké don ? Si i vo mié arès konm ni lé, akoz ni arès pa konm ni lé ? Sa i kol pa, in nafèr konmsa !
Poitan, ni parl ko-dévlopman dépi in sèrtin tan. Ni koné nou la poin moiyin fé nout lavnir san travay la min dan la min avèk nout bann frèr Moris, Madégaskar, Sésèl, Komor... Alor, akoz sé nou sar pli kami dovan nout lavnir ? Pou moin, nou la pa pli fèb lé z’ot ! Nou lé kaziman an avans.

Alor, alon fé travay nout tèt. Alon travay avèk nout bann voizin. Alon fé valoir nout zénès, nout téknolozi, nout bann zidé. Konm sa nou lé si, lavnir nout lékonomi nou va fé sa ansanm-avèk sèt nout bann voizin. Sa lé bon pou nout-tout !

Justin