Mi rovyin zis inn ti néstan si dérnié zéléksyon pou sèy konprann boudikon kisa i sort vinkèr é kisa i sort vinki anndan la ? Nout tout nou lé dakor pou rokonèt la drwat i sort gran vinkèr, vik sontousèl li néna o mwin trann sis si sinkant konséyé, rod pa midi katorzèr pou in kou la drwat la ini a zot é konm i di linyon la péyé pou zot. A nou, minm si néna i rèv war nout parti tonm a tèr, minm si tout i tir kartoush si nou, boudikont ni fé mié ké sov lo mèb. Minm in pé i di « Ni atak nout romonté »

Donkalor kisa la pèrd ? Tout in sominn nou la antann lo bann résponsab politik, shakinn i donn son lésplikasyon, pou in pé, sa la fot gouvérman, i di pou rézon, la politik banna i rant dann mir, pou dot, la gosh té dézini, sépousa i di i fo rovni èk in linyon d’la gosh, désértin la romont ziska zéléksyon minisipal pou ésplik a nou si la pérd tout konséyé si sin pol sé nout fot, la fot lo PCR askiparé, lo minm i di osi ni roprésant pi ryin. Koman ni pé fé pèrd si ni roprézant pi ryin ? Alorss koman prépar a nou pou mié fé domin ?

Tout i réponn, i fo ni fé lo rasanbloman. Mwin la anvi di anfin dopi lo tan ni parl fé lo rasanbloman, mwin la antandi nout kamarad dirizan di dann télé lo rasanbloman lé dodan nout LADN. Li di osi, si pou rasanblé pou solman partaz mandat kont pa si nou, si pou rasanblé zis pou amiz la galri kont pa si nou, si pou rasanblé pou bèz kal bérnik lin a lot, kont pa si nou nonpli, si sé pou koz si in vré prozé pou nout péi, nou lé la. In bon pé moun swa-dizan i vé fé lo rasanbloman èk nou zordi, ni méfié, souvan-dé-fwa i vé ansèrv a nou zis konm léshèl.