Médam Mésyé, La Sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mé zami kozman mi mark zordi an-o la , sa in kozman bazardyé. Zot i koné kan ou i sava marshé forin, ou i domann in kilo tèl shoz, in liv tèl zafèr, in domi-liv sat atèr-la. Zot i koné konm i di souvan dé foi la min la poin lo konpa dan l’èye é la plipar d’tan i pèz in pé plis : inn-dé san gram an plis é lo bazardyé i domann si i fo tir in pé dsi, sansa si i pèz sak néna. Si la pa tro shèr ou lé riskab dir pèz sak néna kite apré pou rogrété d’avoir di sak ou la di. Mi pans pa sa in provèrb avèk son sans prop épi son sans figiré mé mi souvien dann in zistoir, zistoir lo dyab épi zistoir Bondyé té apré partaz lé zam é inn la di avèk l’ot : « Pèz lo pti ta pou moin ! » é fransh vérité mi kalkil sa sé in partaz i bote pa moin ditou, a sipozé moin lé dann in ta é lo dyab i pran lo ta. Alé ! nou va arvi pou lo zistoir é an atandan, mi kite azot rofléshi la dsi. Sipétadyé-sipétadyab.