Mézami i paré demoune La Rényon la pèr mové zam. La pèr sansa i rode rante an kontak avèk zot : in kiryozié pérèz konm i di… Souvan dé foi mi antann dir, kan i pass koté simetyèr la nuite, i fo dépèshé, la pa bézoin amizé kan wi pass la pars néna bann zam zérante é bann zam zérante lé toultan apré rode in kor pou porte azot é si sé ou k’lé shoizi oute poi lé o fé. Porte atanssion mé ou lé mal !

Mézami souvan mi di, dann simetyèr néna moinss demoune danzéré k’an déor, é mi panss sa lé vré pouvréman. Alé savoir si mwin néna rézon sansa si mwin na tor mé shakinn i shoizi. Mi koné issi la Rényon nou néna in zour pou ramass bann z’am. Zour-la sé lo 31 oktob é sa i éspass Sin-Lui osinonsa Sinte Sizane -… san konté sak i fé sa dann zot partikilyé é i bate pa tanbour pou fé konète.

Alé ! Mi kite azot rofléshi si zot néna in am pou ramassé, é ni artrouv pli dvan, sipétadyé.

Justin