Souvan dé foi wi antande dir in shomèr sé in moune i vé pa travaye, donk toute shomèr i vé pa travye. Alé oir sré possib dir : intel lé shomèr é d’apré sak mi koné li gingn pa travaye... Okin bazardyé kominiss téi gingn son karo dann bazar dann in sèrtin tan. Okin sindikalis si li la pèrde son travaye, li rotrouv.

Sak mi di la pa in lidé dominante sé in lidé konmsa é konm èl lé pa majoritèr ébin èl néna okin shanss domine la panssé d’moune dann noute sossyété.

So matin mi antann in moune apré di avèk in ladzoin-mèr : « Wi maryé d’moune é aprésa étone pa ou si i gingn ziska kinz zanfan ! » — In pé bizar konm kozman é mwin lé a d’mandé oussa sa i sorte… Ptète dann lidé bann pov i fé bonpé zanfan. Mé o fète, la pa bézoin maryé pou gingn zanfan ! Anpliss ké sa zordi famiye nonbrèz sé troi, kate zanfan zamé kinz konm lontan. Biensir sé lo mépri k’i fatig in pé ladan.

Dann in lidé dominante sak lé romarkab sé ké la pèrssone i manyé sa, èl i drèss aèl an modèl par rapor sak solon èl lé dann léskalyé konm èl mé la marsh an dsou. Shakinn rante nou va trouv demoune infèryèr ali-an touléka d’apré sak li kroi. Mi préfèr la filozofi k’i, dann in sossyété, shakinn néna son talan é sa sé in kozman k’i mète anlèr.

Astèr ni pé domann anou kissa i tir parti d’in zidé dominante ? Pou mwin i profite sirtou sak lé pa pou l’antante épi la solidarité dann la sossyété. I profite sirtou pou sak lé kontan oir lo siman la sossyété éklité épi lo mir dégréné é sa i manke pa, sanm pou mwin. Sanm pou mwin konte bann zidé konmsa i fo lité sirtou pa aprouvé. Bann zidé dominante i profite bann dominèr an finn konte.

A bon antandèr salu !

Justin