Accueil > Chroniques > Oté
Antanssyon la kiltir ! In bon téate pou lo konba !
Mé antansyon danzé.
mardi 30 mai 2023, par
Mézami, zordi mi panss in n’afèr, é mi yèmré partaz avèk zot. Dizon sète afèr-la, i porte dsi in bataye kiltirèl, in gran bataye kiltirèl pèrdi par demoune – konm mwin téi panss la MCUR narté in bon n’afèr pou nou issi La Rényon.
Zordi in pé va di bataye-la té pèrdi pars nou la pa konbate, fote d’in rassanbléman popilèr konsékan, é final de konte zot i pé avoir rézon. D’ote va di sé pars in droite tradissyonèl, épi bande zoportiniss toute akabi la déklansh la bataye avèk bande moiyin konsékan. Sa lé vré poitan nou lété prévni.
Mi rapèl bien kossa déssèrtin téi di an parlan d’lo konba kiltirèl. Téi di, i fo porte antanssyon lo konba kiltirèl pars dann bande konba konmsa shakinn i angaj ali, a son manyèr, é bande fors ni panss lé batu d’avanss i rolèv la tète é la défète lé pa loin pou sak i panss la parti lé gagné d’avanss. Lo kapitol lé ziss a koté la rosh tarpéène.
Sé konmsa ké nou la pèrde lo konba kiltirèl dsi la MCUR é konmsa ké nou la pèrde la MCUR in si gayar zoutiy kiltirèl noute péi zordi ankor la bézoin pou nou, pou bannzil i antour anou, pou la konéssans nouté péi, son pèp, son listoir. Alon rapèl anou lo provèrb afrikin téi di konmsa : « Si wi koné pa oussa wi sava, rapèl aou oussa wi sorte » .
Zordi nou la bézoin konète oussa ni sorte.
Mé par l’fète, pou kossa mi anparl sa zordi ? Na pwin d’sogré ! Sé pars zordi néna in konba kiltirèl avèk konm téate in l’éstatu épi son déplasman. Konba-la lé pa gagné d’avanss. Li pé ète gagné, li pé ète pèrdi avèk son sékèl ; sa lé sir.
A bon antandèr, salu !
