Dann in plézir i manz, i shante, i danss parfoi, é le moune i rotrouv azot rantre zot mé kèl rotrouvaye si in pé la fine ariv dann vir-vir par rapor l’alkol. Kèl rotrouvaye épi kèl kalité rotrouvaye si lo moune i ariv a dir, épi a frèr dé shoz normalman zot nora pa di é zot nora pa fé si zot lété pa alkolizé.

Abon ! Mwin lé siréssèrtin in pé va dir amwin si wi gingn pa boir, boir pa, mé anpèsh pa lé zot trouv zot plézir dann in paradi mèm in pé artifissyèl. Mwin lé sirésèrtin in pé va dir amwin sé pa lalkol lo problèm mé sé kan i abiz lé pa bon… Ok ! Mé kissa i pé ésplike amwin kansa i abiz é kansa i abiz pa. Kansa demoune i boir modéréman.

Mézami mi koné pa si dsi mon kor, sansa dsi sète lé zot, kékpar néna in kontèr pou indik kan lé dann l’amizman é kan ou lé dann labizman donk kansa wi doi aréte boir pars ou l’apré pran dé risk lé pa bon pou pran é mèm ou l’apré fé prann lé zote bann risk zot i vé pa prann.

Na poin lontan mwin la parti dann in ropa solidèr é lo bann zorganizatèr l’avé prévi trépé d’lalkol : in punch mézon, épi in pé d’vin épi in pé la byèr é sirtou l’avé pa prévi in bivète pou boir pliss ki anfo. Mwin sa téi va amwin mé i paré dèssèrtin lété pa kontan pars lalkol téi fé défo. In pé la mèm di parétil si pou fé ropa konmsa i vo myé évité.

Mi koné pa kossa zot i anpanss. Si zot i anpanss lalkol sé la fète é la fète san in bon doz lalkol la pa in fète pou vréman mi konsèye azot pa trouv dsi zot shomin in poliss pou fé souf azot dann balon : in pèrmi sa lé bien itil é d’ète privé la pa in bon n’afèr pou vréman.. Mi souète pa zot d’ète an voi d’famiye é pa konète pars néna in zanfan a vnir pou soufèr toute in vi. Mi souète bann jenn la plène form pou zot antrotien d’travaye é sirtou pa in réstan d’vir-vir lo landmin matin.

Mwin lé sirésèrtin lé possib mi prèsh dann dézèr mé mi prèsh kante mèm pas mi trouv sa lé bien nésséssèr.

A bon antandèr, salu !

Justin