« Affrontements entre CRS et délinquants à Tsundzu »

Pou kossa mi di sa ? Pars noute parti épi noute zoinal Témoignages la touzour domande anou méfyé noute vokabilèr.Pars si ni méfyé pa, i ariv défoi ni pran parti pou lo koté ké ni vé pa.

Alon rofléshi in kou !

Kossa nou noré di si apré in zourné d’frode éléktoral akonpagné par la vyolanss bande nèrvi sou la protèkssyon é ankadré par bande zandarm, polissyé é d’ote militèr, nou l’avé di par égzanp kan noute kamarad Paul Vergès lété matraké pou mor dovan la méri Sin-dni, si nou l’avé parl d’inn sharj bande fors de l’ord, kossa noute militan nora panssé ?

Nou nora zamé parl fors de l’orde pars lété pa pou mète l’orde ké zot té la mé pou apiyéla politik inzist zo gouvèrnman téi aplike dann l’outre mèr.

Astèr, ni aprann bande jenn laba dann mayotte i apréssyé pa la prézanss bande polissyé pou akonpagn la politik gouvèrnman franssé. Ni sava apèl azot délinkan ? Pou mwin lo mo i konvien pa ditou. Pou mwin zot i apartien, l’èr ni parl, é dann la sityassion zot i lé lo koté rézistanss.

Rézistanss konte la politik in gran péi néo-kolonyalist la fé sak li la fé dopi dé zané é dé zané é final de konte i déboush zordi dsu la sityassion nou lé dann téritoir Mayotte é pou kontinyé son politik gouvèrnman franssé i angaj ali dann pliss la vyolanss, pliss la répréssyon, avèk lo droi shoizi par li-mèm pou konète kissa lé dann son péi laba, é kissa lé pa dann son péi , kissanéna lo droi d’ète la é kissa na poin lo droi.

In problèm voizinaz, sa i règ rante voizin sirtou pa par l’agréssion, épi la vyolanss bande fors poliss i sorte dis mil kilomète de la, épi i inpoz son loi d’vyolanss... Konm zot i oi lo vokabilèr finalman sa sé in shoi idéolozik,ké ni vé, ké ni vé pa.

A bon antandèr, salu.