Pou kossa mi di sa ?

Lé vré fitintan l’avé koté Sin-Pol in tour Oméga é sa lété kouplé avèk in n’ot tour banna l’avé drèss sa dann lérop di nor é nou la pa gingn in bonbardman pou sa. Mé dann tan-la l’avé sak téi apèl lékilib dann la térèr… Bann gran péi sipèr armé l’avé shakinn son fors dissyazion é la lojik lété si néna in fors dissyazion sé pou fé pèr lo ladvèrsèr é pa pou fé la guèr. Donk bann gran péi téi ranfors zot l’armé mé téi i fé pa la guèr diréktoman.

Sé pou sa la plipar d’péi téi aplik lo prinssip : « Si wi vé la pé, prépar la guèr » é rantr zot banna téi fé pa la guèr dirèktoman. Mé zordi néna kékshoz la shanjé. Sé konmsi bann gran péi la pi pèr fé la guèr rantre zot é zot i prépar azot an douss pou déklansh la guèr avèk bann moiyin diféranssyé mé kapab pou sém la térèr zénéralizé..

Nout intéré anou bann pèp sé ké partou néna in politik de pé. Nou dann loséan indien ni di ni vé in zone dé pé. Mi panss partou bann pèp i vé la pé pars sa i sava dann sanss zot lintéré.. Ok ! Mé la pa lintéré bann kapitalist pars pou zot la guèr sa i raporte larzan é larzan sé lo nèr d’la guèr ; Ok ! mé la pa non pli lintéré in bonpé gouvèrnman pars banna i suiv lintéré bann kapitaliss é zot ossi zot i vé la guèr.

Kan lété blok kont blok inn téi fé pèr l’ote, inn téi blok l’ote mé zordi lé pi parèye ditou. Déssèrtin néna lo moiyin pou fé disparète lé zot dsi la sirfass la tèr é sa i doizète in gran soussi pou bann pèp dsi la tèr. Sé pou sa i fo bann partizan la pé lé an évèye partou pangar in nouvo guèr mondyal i pète.

A bon antandèr salu !

Justin