Mésyé, Médam, La Sossyété koze èk moin sé koze èk in kouyon mé sé o pyé d’lo mir k’i oi lo masson.

Mézami bril papyé in moune, sa sé in n’afèr k’i pé ète grav pars sa i vé dir wi détrui son répitassyon, wi fé mal oir ali par d’moune, final de konte demoune i fé pi ali konfyanss é sa sé pa in bon n’afèr pou son rolassyon dann la sossyété.

Bril, brilé, brilèr(ze)… Si zot i rogarde sa dann somi-lo mo Daniel honoré, mi pé dir azot zot i sava trouv inn pongné zilistrassyon… Kissoi sans prop, kissoi sans figuiré, antouléka néna kozman é la pa piké par moush sharbon. Mi sava pa dire azot toute mé konm mi koné bande léktèr-léktèz nout zoinal, mwin lé sir néna inpé rante zot lé kapab fé amwin la losson dsi sète afèr-la ; in pé mèm i sava rodé, épi domande kamarade – méyèr fasson pou konète lé shoz !

Astèr mi di azot « tanssyon-pangar, lonèr konm zot i koné lé konm zalimète, sa i bril in foi, apré napi, mèm si i bril a-tor ». Mézami dan la vi, out passé i suiv aou é néna d’moune i koné ali. Vré, pa vré, mé i koné.. Alors avan di kékshoz tourne sète foi zot lang dan zot boush.

Poukoué ?

Pars si wi bril papyé d’moune zordi, domin in n’ote va bril oute papyé si tèlman ké ou lé riskab pi ète in onm sansa in fanm prope é sa la pa in bon pass sanitère pou noute sossyété. Toute fasson : « Foimi i marsh sou la tèr kréol i koné ! ».

Alé ! Mi kite azot lo tan pou rofléshi la-dsi é ni artrouv pli d’van. Sipétadyé !