Mézami lo tan foutball la-ba déor l’arivé é d’apré sak i di la pa lo méyèr k’i gingn, défoi mèm sré lo pli faye. Mwin pèrsonèlman mi koné pa arien la dan. Mi koné déssèrtin i grate pti boi, d’ote i fé la majik blansh sansa noir, d’ote ankor i fé la majigator, i antèr lo san volaye dann gol.

Mé sa i di, é mwin la pa vi ! Mwin la tandi dir mé dir é oir sé dë zafèr diféran... mèm mwin la zamé oir lo siguidi kissoi ni an noir, ni an blan, ni an pintir, ni an roprézantassion. Mé sa i prouv pa k’i fé, sa i prouv pa k’i fé pa. Mi kroi san kroir toutan kroiyan.

E zot ? Konm ti vé, ti shoize, mé rofléshi bien avan é ni artrouv pli d’van. Sipétadyé.

Justin