Moin la fine ékri é pa arienk in foi, mi èm pa lé shoz i dévalèr anou. Moin la fine di osi tout bann z’ésprésyon avèk péi, mi port pa sa dann mon kèr. Konm la loi péi, l’ésportif péi, in l’invansyon péi - moin la mèm antann Dimitri Payet sé in Platini péi é moin la fine ékri tout lo mal mi pans dé sa. A si l’avé di sé in sipèr Platini, la moin n ora été fyèr mé sé pa sak la di.

Mardi moin té dann in manifèstasyon é in kamarad la fé romark amoin lo R konm rényoné l’apré pèrd térin, l’apré rokil aryèr alé oir pou li-konm pou moin - lo R i doi rann anou for. Moin la fine di : moin lé patriyot rényoné solman mi ronyé pa mon kalité d’sitoiyin fransé é moin lé sir kan lo kèr La Frans i sègn, la myène osi lé pou ségné… Sof si La Frans i amontr pa èl sou in bon zour-mi èm pa La Frans kolonyalis é sanm pou moin son l’antidote sé lo R dann Rényoné.

Mi èm pa non pli kan in pé i mète an avan z’ot doudousité, z’ot kolklorité, z’ot rényonèzté koush a tèr ; In bon rényoné, in rényoné konm mi èm, pou moins é in robèl k’i vann pa son am pou lo pla d’lantiy la fransité... An parlan mi sort lir lo liv dsi Paul Vergès é moin la trouv dann liv-la in onm bien rényoné pars li lé a-fon kont l’ésploitasyon. Sudèl Fuma lé mor é ala pou moin in bon rényoné pars li té l’énmi tout bann dominasyon nou la konète dann nout istoir.

Mi pé anparl d’ot ankor mé moin na poin tro la plas dann mon pti mo d’ékri mé avan sa mi vé mète nout nasyon an gard kont désèrtin rényoné, zordi, la fine pèrd l’R.

.