Zot di zot lé révolté ! Zot i di zot lé rézistan ! Zot i vé l’insèrsyon bann jenn par laktivité ékonomik ! Zot i tap dsi bann mèr, é sa i fé plézir bann zournalis épi bann jenn zot i di osi, zot la poin propozisyon pou zot fèr mé zot nana zégzizans... Moin, dann mon koin, mi èmré konète si zot lé kapab tir La Rényon dann fénoir, si zot lé kapab mète la zénès inpé plis anlèr.

Donk mi èmré konète zot dyagnostik dsi la maladi nout péi la trapé. Mi voudré konète zot analiz dsi lékonomi épi la sosyété rényonèz. Pou kosa La Rényon lé randu ousa èl i lé zordi ? Pou kosa lo bann plan pou dévlop lékonomi i marsh pa bien ? Pou kosa, kan nout lékonomi l’avé in goumantasyon kat pour san l’ané pandan in bon koup d’zané lo shomaj la pa arkil an konsékans ? Pou kosa larzan i rant La Rényon i arsort pli vit é an pli gan kantité ? Mi émré konète pou kosa sak i anklav nou lékonomi lé ankor la zordi, plis soisant sétan apré la loi départmantalizasyon ?

Mi èmré solman konète si pou bann jenn la fé zot mouvman, si zot i pans pa l’otèr sé lo kolonyalism ? Mé pétèt zot i pans pa konmsa. Pétète, zot i suiv lo kouran san romète ali an késtyon ?.

Na poin lontan moin la antann in sobatèr dann in l’émisyon télé té apré di konmsa, si bann révolté na poin in projé politik, sosyal, ékonomik, zot révolt lé riskab éshoué. Mi souète pa sa pou lo mouvman bann jenn i sort kréé, solman mi di azot : "Antansion !" .... Zot lé révolté ? Zot na rézon ! Mé fé atansion : bann zidé dominant : sa i pé trouv in pé partou dann bann radyo, dann bann zournal, dan la boush bann gro vaza. Bann zidé dominant lé pa pou amène azot bien loin. Lé zis la pou amène azot dann malkoté, konm di lo kont, dann in voi san isu !

Justin

NB : astèr, mi pans i fo antann zot i ésplik a-fon zot poinn vi pou zizé. Mi éspèr zot nora l’okazyon é mon bann késtyon i ansèrv ar pi de riyin.