Mi rapèl dann tan isi La Rényon l’avé in bonpé kaz an paye. L’avé pa bézoin gran shoz pou mète dofé dan la kizine épi dan la kaz. Téi sifi d’in fé mal étinn. Arzout èk sa, souvan défoi demoun téi gard la brèz pou ralime lo fé landomin matin. Mi an souvien in zour, dopi l’androi nou téi rèss, moin la vi bann gran flam-pars lété lo soir sa l’arivé !-Demoun téi i kriy O fé ! O fé ! épi demoun téi kour an dsandan pou alé done in kou d’min la famiy dann malizé é mi rapèl bien demoun téi kriy : « Do fé la pran dan la kaz Barbin ! Do fé la pran dan la kaz Barbin ! ». Bien antandi l’ède demoun la pa ansèrv de rien é lo kaz konm la kuizine la bril san pour san… Mé nou l’apré anparl in provèrb nou la é provèrb-la i vé dir a popré : alon méfyé, pars dofé i kouv souvan dé foi sou la sann. Li lé bien kashyété ! Ou i pans li lé pa danzéré é oila toudinkou danzé i ariv, malèr i ariv, é avèk in l’anmèrdman lépa kroiyab. La lé pi in késtyonn fé, dé sann épi d’brèz sé solman traka d’la vi i mank pa kan ou lé an sosyété. Alé ! Mi kite azot rofléshi la dsi é ni artrouv pli d’van. Sipétadyé !