Pou sak néna in pé laz, bann 50-60 a monté, plito 60, zot i an souvyin dann tan lontan kan té i konstri shomin, minm si té i fé bout par bout, souvan-dé fwa té i tonm si gro-gro rosh é pou fé pèt lo rosh konm navé pwin bèl-bèl mashinn konm koméla, té falé fouyi in trou dan lo rosh é aprésa mèt in mèsh la minn anndan pou fé pété. Mé avan fé pété, té falé avérti tout lantouraz sépousa té i kri for “Antansyon la minn“. An atandan, tout té i kashièt. Pou kosa mi an parl a zot dé sa zordi ?

I prétan i komans santi èg koté lo piramid, dékin moun èk in linz blé i prézant, kiswa in moun i pass, kiswa in zanplwayé minm, kiswa in planton, sito li néna in linz blé konm zandarm, zéli konm zanplwayé tout i fé d’luil i di. Sépousa mi di “antansyon la minn“. Alorss an vil domoun i koz. Pou désertin sé lo pli gro léskandal dé listwar la Rényon. Rod pa poukoué néna i atann sa ? Mi koné pa si lé vré, i prétan kan va pété, pétèt nora sékouss ziska déor.

I prétan banna la finn trouv lo pié zouminn, lo pié zouminn lé isi la Rényon, néna i di minm pétèt lo grin i pé èt lwin, i pé èt minm déor, sépousa zordi banna i rosèrs in pé déor. Mank in pé zordi i trouv pou vréman lo grin la ba. Kan va pété, va pèt télman for, nout tout nou va antann i di. In pé la pasyians pou sak i vé konèt, in pé la pasyans ziska mwa d’séptanm. Konm i di “avan lèr lé pa lèr apré lèr lé pi lèr“. A nou, anon provnir nout lantouraz vik i sa pété, anon provnir “Antansyon la minn“.