Zilé zone par isi, zilé zone par la, gran déba par isi, gran déba par laba, référandome sitoiyin par isi référandome sitoiyin par laba. Oplis i shanj, oplis i rèss parèye ! An touléka sé sak mi rotien pou l’instan.

Pou kosa ? Pars final de kont tout i koné kèl maladi l’atak nout sosyété é dopi in bon koup de tan. Maladi-la i apèl l’inégalité : lèss bann rish ranpli z’ot pla ! Lèss azot anrishi azot plizanpli é pandan s’tan-la la pa bézoin lité vréman kont la povrété.

Kisoi dann La Frans légzagone, kisoi dann bann péi l’outromèr. É tan k’a fèr sak i vo pou la Frans lé vré pou lo mond antier é sa sé in politik k’i marsh pars oplis i sava oplis in pti trépé d’moun i karsèr bann rishèss pou zot, éin gran kantité d’moun i viv dann la povrété si la pa dann la mizèr.

Antansyon, sa i ari pa konmsa par lo azar, sé in téori in pé la mète an plas dopi dann tan Ronald Reagan, madanm Thatcher ziska zordi avèk Trump, madam la shansélyèr lalmagn, mésyé Macron é konm Brassens téi di : « lo bann ki kouzi avèk dolor ! »…

Dabor i fo in minorité lé plin o zas : bien péyé épi vèrni par l’akimilasyon lo kapital. I fo minorité la i pans sèryèzman èl lé sipèryèr la majorité d’moun : si moin lé bien péyé, sé pars moin sé in onm (sansa in fanm) dé valèr... Pou la mazorité, i fo zot i tir lo dyab par la ké ; i fo i mine azot avèk l’ésploitasyon kapitalis sansa kolonyallis konmsa o moins i pé fé in bon pli valu dsi lo do la mazorité dmoun.

Donk sé pou di, rantre nou, in sityasyon konmsa sa lé vouli, sa lé kalkilé, sa i ariv pa par azar, mé pars an o-lyé néna demoun i vé sa é i tienbo a sa… plis ké zot i antien la prinèl nout zyé. Mé antansyon, konm i di, bann rishar l’apré vèye anou.