Oté

Antansyon lé ga,La shass rosh masiv lé rouvèr, konm dann in tan téi rode sitarane partou.

Justin / 17 septembre 2019

Néna désèrtin péi i soufèr in mank dolo, d’ot i soufèr in mank manzé,néna d’ot kalité i mank ankor tout sort zafèr, mé i paré La Rényon néna in mank rosh masiv. Kosa i lé sa ?Sa bann bèl-bèl rosh lé nésésèr pou fé bann gro-gro travaye konm par ébzanp la rout an mèr.Sa bann pyèr-la, shakin i pèz plizyèr tone é anplis lé konpakt, é lé fé pou rézist bann bèl-bèl shok.Té pou sa dopi la rout an mèr la komansé ziska zordi bann l’antropriz l’apré rode bann rosh masiv.

Lé pa ké na poin ditou é i prétan dir néna mèm in pé partou :néna Sin-Lé, néna La Possession, néna sin-Pol,néna Sintandré mé i paré laba lé konm lo mèr-li la pa bon. Alor kosa i fo fé ?Alé rode Madégaskar :lé vré laba néna an kantité, mé oila bann rosh malgash i prézant plizyèr défo :inn i paré si ou i sava tir sa, ou lé riskab fé lèv bann mikrob La Raz é sa la pa bon pou zanimo, dé i paré bann l’antropriz téi vé si tèlman ésploite lo péi ké Madagaskar la di éstop in pé, troizyèm défo li ariv par la mèr é bann kamionèr i gingn ar pa travaye-konm la promète azot...

I fo dir banna lété pou kékshoz dann la défète Paul Vergès dann zéléksyon réjyonal.

Dopi s’tan-la , lo préfé la bien sèye propoz son plan d’karyèr mé tribinal, an tribinal, ziska lo pli gran tribinal dann Paris la kass son plan,larash son dan épi tout sète son bann konplis.I paré laba banna la pa pèr bann kamyonèr La Rényon.I paré galman i fé pa d’kikilik avèk la santé d’moun, i pass pa la santé d’moun par pèrt é profi. Anfin sé sak i di ! Antouléka sé sak la di so foi isi.

Téi falé pa plis pou rolans léspékilasyon :moin la lir dann zournal in pé i vé alé rode rosh Moris-antansyon laba sé La Répiblik Moris é li néna son droi pou fé réspékté,é li néna son zintéré i pass pa par pèrt é profi, épi laba lé bon pou tir la mote dann zyé bann bourboné, mé la pa bézoin bann bourboné i sa sèye tir la mote dann zot zyé. Alor moin néna konm linprésyon i fo lèss tonbé.

Ala pou kosa in shasèr gro kalib, in sèrtin Poudroux,koméla dépité La Rényon la sort dan son somèye épi la di li koné ousa néna é san sousi siouplé pars zistoman landroi i apèl Sansousi.Li souvien zordi, kan li lété prézidan Konsèy zénéral, in létid la pass sou son zyé épi zétid-la téi di : Sansousi néna sak i fo san sousi siouplé.Didier Robert k’la fine désid shap avèk la réjyon pou alé prézid in n’afèr dann la ri s’Paris-Sin Dni lété an alèrt rouj mé li la di :sa sé pa mon afèr, sa sé l’afèr bann gro lantropriz l asign kontra avèk la réjyon.Lo rèss i konsèrn pa moin.

An kékmo li la di : moin lé pa la avèk sa é bann shasèr rosh na ka fé zot boulo.. Sète foi si, i komans fé pèr amoin pars majine in kou i trouv in mine rosh masiv sou mon kaz.La i désid kass mon kaz pou alé trap lo rosh é moin mi sava dann grote so kou isi ? An touléka, lé ga, mi domann azot méfyé azot pars la shas rosh masiv lé ouvèr é bann fin limyé lé partou a la roshèrch bann rosh konm dann in tan téi rode Sitarane partou.

Justin