Pou dir in moun lé an kolèr ou nana lo shoi dann somi lo mo. Ou i pé dir lo moun lé rousté, lé bandé, lé bandosh, lo zamal la monté, lé an ké d’bèf sansa ou i di sinploman son kolèr la monté. Domaz moin na poin in diksyonèr bann sinonime sansa avèk sa solman moin té kapab ranpli mon pti kronik dann Témoignages. Solman, oila, nana in n’afèr i tourn an boukl dann mon tète é sé sak moin la mark an-o la. Mafatanboi ? Manz mafatanboi ? D’apré sak in bon dalon mèm in frèr la di amoin sa in lyane la foré, avèk pti fèy rouz é demoun té i ansèrv sa pou tyé lo shien. Donk si in moun i boir sa, moin lé près sir i fé pa li d’bien pétète mèm li rant dann in kolèr fol é li lé paré pou fé n’inport de koi. Si zot i koné plis ? Par ébzanp si zot i koné in n’ot nom pou apèl lyane-la, fé konète amoin. An atandan mi lès azot kalkilé é ni artrouv pli d’van siplétadyé.

NB In mo konpozé la lang malgash. Mahafaty = danzéré mèm mortèl, sansa k’i san mové. Amboa : shien. Donk in lyane k’I pé donn la mor in shien (dann ptit glossaire par Jean Albany).