Trozour la la ni sort dann in zéléksyon. Toulmoun la romarké, zis inn ti ponyè d’moun la lévé pou di son proférans, pou élir zot konsèyé départmantal, minm pa sinkant pour san d’moun. Boudikont ni pé sèy konprann vik, ankor zordi ni koné pa touzour poukoué nou la voté, ni koné pa touzour kosa lo nouvo lasanblé nora lo drwa fé, ni koné pa kosa lo nouvo lasanblé va nyabou fé, mé konm i di « Tansyon pangar a partir dorénavan ni sora pi konm avan » vik la kantité d’moun néna pou okip dé nou, ni pé dor trankil, inn prézidant èk kinz vis-prézidan i di a nou « dor a zot marmay ni vèy si zot »

Tou zis, ni sort dann inn, nou la pokor finn byin dizéré ni rant dan lot. Mwa désanm i romèt sa. So kou si, lé pli sérié i prétan, i manié plis larzan i di, sé pou zéléksyon rézional. Konm ni koné léta lé oki, zot minm i di, léta lé an fayit, donkalor kont pa tro dsi in gro takon larzan. Néna kandida lé déza dovan la port lo préfé pou poz zot kandidatir, i fé déza léshofman, aforss shofé, i riskab brilé ziska mwa désanm, i riskab gingn léshofman osi. Souvan-dé-fwa minm moun i prézant son mizo konm si tousala i konsèrn ryink in kalité d’moun.

Konm mi antann kandida i mankra pa, la osi ni koné pa nonpli kosa lo konsèy rézyonal va okipé vik i tir in pé konpétans dann konsèy départmantal pou mèt dann konsèy rézyonal. I dézabiy inn pou pétèt mèt lot tou ni, ni koné pa. Touléka minm la ba déor ankor zordi banna i atann pou war. Sanm pou mwin tout lé fé pouk in momon poul i trouv pa sonm ti. Konm sa la étonn pa nou si domoun lé pi la èksa. Mé pou mwin mi di antansyon, mwin néna lo santiman si ni kontinié konm sa, antansyon ni fé bélot èk robélot !