Kosa i lé in zandarm ? Sé in onm de loi, an prinsip k’i ramenn l’ord. Mi di an prinsip pars moin la koni inn-dé métèr d’dézord an parmi. Dann nout kozman pou la rout sa i vé dir lo madam k’i vien mète a l’ord son mari in pé tro porté dsi lo sharète, sansa pli for pou kozé ké pou travay. In pé i apèl sa osi lo gouvèrnman. Sanm pou moin sa i prouv ké dann in ménaz i ariv dé foi ké lo vré mète sé pa sak ni kroi. In pti lésprésyon mi aprésyé bien : Marmay, kisa i komann la kaz kan z’ot momon lé pa la ?... Kosa zot i anpans de sa zot ? Arien ditou ? Fé travay z’ot koko ! Fé bouy z’ot matyèr griz ! Zot va oir, ké, rant-rant, ni pé z’ète, tazantan, dakor rantre nou.