Oté

Antansyon pa fé disparète nout tango !

Justin / 12 févrié 2019

JPEG - 43.6 ko

La frans lé divizé an dë : sak i pans La Frans lé divizé par dë épi sak i pans èl lé pa divizé par dë. La Rényon lé divizé par dë solon in n’ot poinnvizé i apèl la boustifaye. Pa ninport lakèl sin ploman sète lo pti mizo ; donk néna sak i manj kari pti mizo é sak i manz pa.

Si ou i pouss pli loin ou va trouv sak i fé kui tèl fason é sak i fé pa kui tèl fason. Si ou i ékout bann manzèr tang mi pans ou néna pou aprann de zot. Dabor va di tang néna in drol lodèr é si ou i tir pas o lodèr ébin ou lé riskab ginye mo d’ kèr… Moin la konète lo tan demoun téi frote la vyann dann zèrb épi dann fèye pou tir lodèr. Dimansh néna in ga la di amoin konmsa koméla i pèrd pi lo tan pou fé sa. Koméla i flanm lo kari avèk i n vèr lo ronm é lodèr i sava tousèl ko nm par in kkou d’maji.

Dimansh néna in lérézyak la di konmsa, li pans tang griyé sa i doizète famé. Plizyèr pèrsone té la, lété ziska kapab modi ali pars néna konm in sèrtin séktarism dann la kuizine konm dann tout z’afèr. I di pa i mète pa safran dann brède mouronm ? Ou i mé kosa k’i di pa dsi la tèr bondyé : i di tout épi lo kontrèr d’tout. Dsi poinnvizé-la, demoun i diviz an dé é sa nou la fine anparl pli o.

Tourné, viré ! Tourné-viré ! Mé i anpèsh ar pa poz o késtyon inportan aou, manz aou, artyé aou, armanz aou ! Ziskakan ? Ziskatan nora é kan nora pi ? Kisa i fini avèk ti izo-la ? Demoun i fini sa. Konm la fine fini avèk d’ot shoz. Alor alon fé antansyon pa fé disoparète nout tango.