In tan, la pa si lontan ké sa, mwin téi kroi in n’afèr konmsa : dann mon kèr mwin téi rèv la mizèr nora disparète, le moune noré té plizanpli intélizan, kapab trouv la klé in kantité problèm é sirtou ansèrv sa pou instal la pé. « A shakinn solon son bézoin plito k’a shakinn solon son moiyin. ». Anfin mwin téi rèv in sossyété kominis si zot i vé.

Noré té bien in n’afèr konmsa mé nou la pa sir k’sa lé vré. Tazantan la sossyété i rokil : demoune lé plizanpli dann fénoir, la mizèr i okipe la plass, lo bande droi fondamantal i diminyé, bande nouvo maladi i aparète-i di k’i émerj, lopréssion avèk la répréssion i ranplass la liberté. Sé sak iéspass in pé dsu la tèr dopi kéktan. Bien sir par plass néna déssèrtin zandroi la vi lé méyèr, mé néna d’ote la vi lé pli dir.

Zot i koné l’Amérik ? Zot i antan dir sa sé lo péi la libèrté pars i prétan dir laba néna pliss la libèrté ké d’ote zandroi. Mé oila k’in tribinal la désside mète in poin d’aré avèk lo droi avorté. Pa in poin d’aré pou vréman, pars la loi la défoss ali dsu bande zéta – USA sé in péi fédéral – astèr néna 14 zéta i i nterdi l’avortman. Mé domin konbien ? In sinp zéléksyon dann in l’éta é li balans l’ote koté.

Zot va dir amwin sa i fé dann l’Amérik, pa dan la Franss épi La Rényon. Pou l’instan é domin, é apré domin, kissa i di azot in majorité obskirantist lé pa riskab pran pouvoir é marsh avèk bande intégrist. Pou kass lo progré landroi li lé. Pars mé zami issi dsu la tèr na poin arien lé gravé dann marbre é kékshoze i égzis, domin lé riskab tourn an mal.

Ala pou kossa mi di azot antansyon ! Sak lé bon zordi lé riskab ète shanjé domin. Kossa ? Ébin in bonpé zafèr. Antansyon, alon méfyé, alon rézisté…

A bon ékoutèr, salu !

Justin