« Anval in mo sé garde in zami »

Mézami zot i koné lo ropa d’in boug i apèl Esope ? Mi pans ké oui, mé mi propoze rande ali ankor in vizite. Esope té in zésklav é son mètre-in Roi d’apré sak mi pans-la di ali prépar lo méyèr ropa possib. Li la fé kui la lang in pé toute kalité manyèr. Lo roi, ragoulé la di ali : donn amwin lo pli mové manzé possib é li la fé kui la lang in n’ote kou.

Kan la dmande ali zésplikassyon, li la réponde sé pars la lang sé lo méyèr é lo pire zafèr. La lang i pé di dé bone shoz, mé èl i pé di galman mové kozman. Mézami mi domande azot bien rofléshi la dsi. Kréol i di : « Tourne sète foi oute lang dann oute boush é sar pa d’tro. ». Anpliss ké sa, mi pé azoute in n’afère, sé k’i « atire pa moush avèk vinèg » é mi di sa, an dirèkssyon demoune zényal mi koné, mé zot mové karaktèr épi zote inkapassité pou tienbo zot lang, la pèrde azot.

Alé ! Nou va artrouv pli d’van é mi domande azot rofléshi la dsi é n’artrouvé sipétadyé.