Mésyé, Médam, La Sosyété, koz èk moin sé koz èk in kouyon-sé o pyé d’lo mir k’i oi lo mason. Mi pans zot i koné kozman-la dopi lontan ; dopi lontan zot i koné kozman-la. Konbien foi in kékshoz konmsa i ariv ? Konbien foi ou i rozète kékshoz épizapré ou i fé dé pyé é dé min pou rékipèr ali. Na a pène dé somenn, moin la antann dir in kamarad la armaryé avèk son l’ansien madam. Alé savoir pou kosa ? Rézon ou bien tor, ozis mi koné pa mé kan li la fé lé shoz konm k’i fo, kan li la arparti domann son lansien madam pou maryé é kan li la parti oir lo momon ébin madam-la la réponn ali sak moin la mark an-o la, épi li la di li la fine di sa fiy parèye. Sak i fé shakinn la gingn son konpliman. Mé néna in ta d’ka i pé rotrouv kozman-la sé pou sa mi domann azot bien rofléshi dsi la késtyon é nou va artrouv pli d’van. Sipétadyé !