Matant Zélida la ékrir Justin :

Mon shèr nové, mon spès salté, rouj-de-fon dovan létèrnité,

Sépa si ou la romarké, sézon zéléksyon l’ariv ankor. Kandida nana in ta in paké. Promès i mank pa ! Par l’fèt, promès sé dèt… dan tout kalité zafèr, sof dann zéléksyon. Akoz mi di sa ? Pars zot, bann rouj, zot i pans zot lé pa parèy tou lé zot. Zot, si mi kroi zot bann kozman, zot i promèt aryink sak zot i pans zot i pé fé. Alé oir, la pa in bougrès konm moin zot va trapé. La pa in bougrès konm moin zot va nyabou fé kroir zot lé tousèl pou pans sak zot di, é pou fé sak zot i promèt zot va fé. Lé zot ? Sé marshann parol ! Lé zot ? Sé aryink la kom ! Mon zanfan, zot i koné bien lo kozman k’in ga té i apèl Edgard Faure té i di : « In promès i angaj solman sak i kroi, pa sak i fé ! ».

Ala in kozman lé bien vré, pou zot konm pou lé zot. Tok ! Pran sa pou toi !

Justin la fé pou répons :

Mon vyé matant ki koz solman la boush rouvèr,

Vi koné, lo mond, mèm lo mond la politik lé partajé rant dé : promyé kalité i fé lé shoz pou zot é pou zot solman, pou zot èt fyèr d’zot, sansa pou gonf zot pla, boudikont, tout i tourn otour d’zot. Dézyèm kalité i fé sa pou fé avans zot zidé, kisoi zot zidé pèrsonèl, kisoi zidé zot parti, zot filozofi. Dann lo promyé ka, la pèrsone lé paré po maryé èk ninpot ékèl zidé provik i ansèrv azot. Si lo zidé i zoué pa lo rol zot i vé, i shanj zidé konm i shanj linj. Sa i apèl bann moun oportinist, é si ou i débisk pa zot l’èr ki fo, fouti pou ou pli d’van ! Dann dézyèm ka, ou i pé èt dakor èk zot zidé, ou i pé èt pa dakor. L’avantaj, banna i avans pa maské... Sa lé vré pou d’moun nout parti, konm pou d’moun d’ot parti an zénéral, sof konm di lo kont, kan lo lou i mèt in po mouton d’si li... Sé pou sa shak parti i doi zèt vijilan, bien konèt son moun, épi bien travay èk li.

Boudikont, lé shoz lé sinp, mé na poin aryin konm lé shoz sinp lé difisil konm sa pou apliké... Ou i oi matant, kan ou i di sak ou i di, ou na tor, mé aoir tor, pou ou, sé in dézyèm métyé. Tok ! Pran sa pou ou !

Justin