Matant Zélida la ékrir Justin
Mon shèr nové, mon spès salté,
Mi antan i di, in ga i apèl Cantona i vé fé sote la bank. I prétan li la domann bann moun sak nana larzan déssi zot kont tir ali ziska lo dèrnyé grin. Li di konmsa, si troi milyon d’moun dan la France i fé sa, la bank i sote, é konm la bank sé lo pyé d’kèr la sosyété, sé la sosyété k’i kass par boute. Lé foutan in n’afèr konmsa. Moin lé a d’mandé si so méssyé Cantona la pa, li ossi, in rouz de fon. Touléka, si demoun i ékout ali, moin lé sir, dan sète afèr, final de kont, sé bann ti-kolon ankor va gingn zot sos, é bann rish va ansort azot la-dan. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Ala ou lé parti dann out délir. So kou issi, ou i pans out dévoir sé défann la bank, pars ou la pèr oir so léspès sosyété an dégréné, fou dann fon ranpar. Pou ou, la bank sé bann kapitalis... bann kapitalis lé dakor-dakor avèk la Droite, é ou na konm linprésyon banna sé out z’ami. Mon pov matant, ti-kolon la pa kamarad avèk la bank. Souvan dé foi, èl i vé mèm pa banna i rouv in kont, é si lo kont lé dann rouj, tansyon pangar, out poi lé o-fé. É, pou la késtyonn fré, la bank i zoué pa avèk ou !
Zot i bate déssi léstoma pou dir zot la pa bézoin l’Etat, mé si la koup la manké, zot i kriy siouplé. Tan k’a l’Etat, li marsh a j’nou pou alé ède banna par kou d’750 milyar. É ou, pti kolon, ou n’a ka manz a l’odèr !

Justin