Bann minis l’il Maurice la vni oir anou in pé pou tir plan déssi l’avnir. Pou oir in pé lo késtion lénèrzi k’i ronouvèl, akoz zot ossi nana mèm problèm ké nou : zot na poin pétrol, zot na poin sharbon, amène kouran dépi in n’ot péi la pa in gouyav. Solman zot nana la mèr, lo van, solèy, kann, épi d’ot zafèr ankor.
Alor, zot la vni rann anou in vizit pou bien rann azot kont par zot mèm kossa ni fé issi : kossa nou la fine fé, épi kossa ni kont fé ankor dann lavnir.
Biensir la parl léstrésité a partir d’solèy : Paul Vergès la ésplik, déssi la rout tamarin nora bann landroi pou ropoz in pé, sa nou té i koné, mé nora galman lizine léstrésité solèr pou “ranpli” batri bann voitir éléktrik.

Akoz banna i vé dann kinz an, an avoir in bon pé loto éléktrik La Rénion*. Sa in bon pé nouvèl pou nou an mèm tan. Sa i vé dir nout vié kamarad solèy i sava rann anou bien sèrvis dann lavnir. Apollon, bondié solèy, si tazantan ou i fé nout malèr, ou na moiyin fé galman nout bonèr... si ni vé bien.

* oubli pa lidrozène, lèr konprimé, épi d’ot zafèr ankor... Tanpir k’i rod, tanpir k’i trouv, é lé pankor fini.

Justin