Dëpï moin lé pti, mi antann toultan siklone i tap madégaskar. Kan moin té domann mon papa akoz in linjïstis konm sa, lï té i amontr amoin solman la kart loséan indien épï moin lavé konpri madégaskar lé kondané viv avèk siklone.
Donkalor,la solïssion sé dévlopman dïrab : i fo la rout, i fo la dig, i fo bann kaz solid, i fo léléktrisé, i fo in méyèr sistèm pou la santé, i fo in gouvèrnman i travay pou lë péi, i fo mobiliz la popïlassion.
Dann péi-la nana patriot, mi pans. Banna i pë fèr in nafèr : anplégné, anplégné i sïfi pa.I fo dévlopé, dévlopé ! Protèz lanvironnman, avèk lèd intèrnassional, pa avèk bann néokolonialis. Banna va plïto ral azot dann fon, olèrk mèt azot anlèr.I fo anvoy azot fèr fout !
Ben,nou, pti konm nï lé, kossa nï pé fé ?Shak foi i kri way, la-ba, nï tir nout pyès "jone" konm ki diré madam Chirac. Mi di pa i ansèrv pa arien, mi di sa la pa in solïssion pou d’vré. Nou, nou pë aport nout solidarité : èd banna dann zot projé épï aport solïssïon. Aport solïssion, sé joué nout rol konm ki fo.