Kank nana gran shantié i doi rouvèr, sa lé bien konpliké. Néna si tèlman travay pou fé, avan donn lo promié koud piosh ! Konbien n’tan sa i pé pran ? Dé z’an, troi z’an, katr’an. Touléka, in bon koup de tan. Zot i koné Boulvar Sud, zot i oi konbienn tan la pran épi zordi ankor la pankor fini. I oi la fin solman !
Sé pou rézon, moin lavé la krintiv, i fé pa lo nésésèr pou fé la formasion bann travayèr pou fé lo tram-train épi la rout-an-kornish. Konmsa nora pa bézoin alé rod demoun déor pou travay issi !
Vèy sa konm delé sü d’feu akoz na poin rien lé pli fasil fé vni la min d’èv. Kroi amoin, déor la-ba, nana inpé dann zot bann sirkui-piston l’apré vèy sa, épi mat in plan pou pran bann plas travay, épi lèss bann rénioné atèr.
Yèr, kan moin la gard dann zournal, moin lété kontan oir l’apré prépar bann moun pou travay déssi bann gran shantié. I parl sis mil pèrsone. Tan mié pou sak va gingn in boulot. Ni pé dir bravo pou sak la mèt an plas prozé-la : par avans, aprann kréol travay pou donn kréol travay.

Justin