Moin la rèv moin té konèt lir. Sa in rèv gayar pou vréman.
Zot i koné lir ? zot i pé pa konprann kosa mi di kan mi di « gayar ».
Moin la trap liv mon bann marmay i sava lékol : Moin la mèt bon koté,in kou mem. Moin la rogard kosa lété marké an pti lékritir dosou bann foto. Kan moin téi rogard lo bann zimaz, moin nora pa mazine banna lavé ékri zafèr komsa.
Moin la trap karné liézon bann marmay moin la lir. Moin la rann amoin kont par moin-mem zot i travay bien lékol. Mon bann zanfan i promèt bien po lavnir.
Moin la trap livré d’famy, moin la vi lo nom mon famy marké anndan.
Moin la lir tout sak lavé pou lir dan la kaz.
Moin la parti guèt dann tiroir, bann kart mon madam té i anvoy pou moin kan nou té i frékant : sa bann kart lontan avèk zoli zimaz in koté épi domoun téi ékri déyèr Mon madam -la té i em amoin pou vréman : kalité konpliman moin la lir la-dan(moin lé sïr moin téi mérit pa, solman moin lété kontan toul bon).
Apré somèy la pèz amoin, moin la lèv gran-matin.Moin té konèt pi lir.
Moin la rakont sa Justin komsa li mark dann zournal.
Moin la di ali : mi vé aprann lir, ninport kèl lang solman mi vé aprann lir. Aprann lir épi aprann ékrir.
Na plis san mil pèrsone kom moin isi, kisa va antann anou ?

Justin