I fo dir lé pa in n’afèr tro nouvo pars d’issi d’laba, dann La franss épi dann d’ote péi néna dmoune pou vante azot aprann bann ti marmaye lir vèr troi-katran. Mi di pa k’i gingn pa, mi di k’i gagn mé dann in sityassion priviléjyé. Osinonsa avèk bann marmaye i apèl sa sirdoué.
Biensir bann sindika proféssèr la mète an kolèr pars pou zot si i fé in n’afèr konmsa avèk lo mouvman larzan v’alé ansanm ébin bann zanfan rish va réissir é bann zanfan pov non pars zot paran nora pwin larzan pou péyé donk prozé-la sar in zoutiyes pou in linégalité ankor pli gran é pa ditou in zoutiye pou l’égalité é mèm pou la démokrassi…
Astèr kossa mi di mwin pèrsonèlman pou La Rényon, pou mon péi. Mi di nou lé dann in péi avèk lo franssé konm lang ofissyèl épi lang lansègnman avèk dopi kéktan in pti rouvèrtir dsi lo kréol rényoné… Arzoute èk sa in gran lékar dann la popilassion pou lo kivo d’vi.
Alor sé bann vi ké zot i koné ni la zanfan rish va bénéfissyé lo prozé mi anparl an-o la. Avèk in danzé siplémantèr pou bann marmaye kréolofone : lo danzé d’abandone ankor pli bonèr zot patrimoine la lang épi la kiltir é mèm pa réissir dann lo nouvo prozé pars zot i koné pa ankor arien dann la lang épi la kiltir bann franssé… Pars biensir lo prozé sar an franssé-lang é kiltir-é pa an kréol-lang é kiltir… Donk in mové kou pou bann pti franssé é in arshi-mové kou pou bann pti kréol.
A bon antandèr salu !

Justin