Mésyé, Médam, La sosyété koz èk moin sé koz èk in kouyon, mé sé o pyé d’lo mir k’i oi lo bon mason. Mé zami, moin lé sir zot i koné kozman-la. An touléka, moin pèrsonèl, mi rapèl bien moin la antann sa bonpé foi kan moin lété jenn mèm. I fo dir dann tan-la, téi nouri pa bonpé lo shien, si tèlman bann zanimo-la lété toultan mèg é sanm pou moin zot l’avé toultan fain. Zamé d’la vi nora done lo shien in bon zasyète manzé pars lo moun zot mèm l’avé poin… Astèr konm kozman-la sé in provèrb li néna son valèr pou la vi dann la sosyété. Sinploman, i vo myé évite done demoun mové labitid, vilin défo. I vo myé done bon labitid, bon kalité é sé konmsa lé shoz va myé marshé. Alé ! mi, kite azot rofléshi la dsi é ni artrouv pli d’van. Sipétadyé.