Mi pans, konm moin zot i koné bien bann sityasion konmsa. Kan l’anvi fé la fète i pran aou, ou i dépans, ou i dépans épi kan la fète lé fini traka i pran dsi ou. Kan mi di traka i pran dsi ou, sa la pa pou plézanté, lé konm in fyèv. I fé sho, i fé fré, i fé sho, i fé fré-in pé plis ou lé malizé pou siporté. Pou koué ? Pars momandoné ou i kont pi é kan ou i kont pi, sé l’èr lo tan l’annuiman i komans pou ou. Na mèm désèrtènn foi, désèrtin i di : « So kou isi, pa d’fète, pa d’dépans ! ». Mé dèrnyé zour la fyèv dépansé i mont dsi ou. Pti kado, moiyin kado, gro kado, pti dépans, moiyin dépans, gro dépans. Out bidjé lé pa paré pou sa vi k’ou la désid fitintan pa d’fète sète ané. Mé momandoné, ou la anbandone out bon rézolisyon é oila k’ou i rant dann in trin ou i vé pa. Alé ! Mi kite azot rofléshi la dsi é ni artrouv pli d’van. Sipétadyé !