Mé dan lé ba sé kékshoz mé dan lé-o sé in n’ot listoir. In zour in boug i téléfone in radio pou dir son dovann porte, laba La plaine dé kaf, i fé in dogré. Kalkil azot in pé !… In ané mwin téi vé alé abite La Plaine des palmiss. Pou koué ? Pars mi rapèl inn-dé vakanss mwin la pass laba donk in késtyonn nostalzi. In sakré motèr pou lo konportman imin.

Astèr mi domann azot kossa i sava ariv anou tanto a partir d’moi Novanm. Pou mwin la shalèr i sava doz anou. Zordi ni di laba dann la franss i fé pliss karant dogré dan lonbraz é ni di rozman nou lé pa laba. Mé zot i kroi Al ninio va évite La rényon ? zot i panss ni sava trik la sho ?

Alor ? Kossa i fé ? i di laba dann léspagn banna i fé zoiné kontinyé. Donk kan i ariv troizèr pi d’lékol, pi d’shantyé, pi d’travaye dir. Néna mèm kat zour d’konzé shalèr. Arzout èk sa bann l’abri fréshèr in pé partou. Akoz pa issi ? Kan i fé pliss karant dégré i lèss pa bann térass rouvèr pou pa k’lo sho i fatig bann travayèr.

Mi antan in miniss apré dir a partir laba dann la franss sar konm léspagn a partir. Mwin mi di azot : é nou ! nou ! é nou ! I fo in plan pou nou pou évite in pé la sirmortalité.

Kossa zot i panss zot léktèr témoignages ? Souvan zot néna bon zidé mé astèr ? Zot i konpran konm i di : « lé tro tar pou bloké kan ou la fine fé dan out dra ! »

A bon antandèr salu !

Justin