Sa in kozman i trouv dann bonpé péi. Lé sir si la plui i tonm, in zour èl va rété é nora bo tan. Mèm déliz la fini apré karant zourd’apré sak i di dann bann zékritir lontan. Dann tan siklone Yasinte, si mi an souvien bien, la plui la tonm vintéin zour apré la rété. Astèr sé a nou d’oir kosa ni apèl bo tan pars la séshrèss la pa l’bo tan sa : la pousyèr i donna ou, la tèr lé sho si tèlman bann plantasyon i vé pa pousé, avèk tousala in shalèr pa posib. Donk shakinn i shoizi son bo tan : bo tan plantèr, la pa bo tan demoubn apré griyé dsi la plaz, bo tan kanar la pa bo tan poul… An touléka, apré k’nou la di sa, astèr nout kozman néna in n’ot sans, in sans pou la vi an sosyété.L’èrla, ni pé dir, la rou i tourn é apré in pèryod an kouyon – in pèryod do shyass, in pèryod vash mèg-i pé an avoir in bon pèryod, in pèryod de shans, in pèryod vash gras. Alé ! Pou sak lé an pèrtyod de shyass pran pasyans lo tan la shans va arivé. Pou sak lé an pèryod de shans prépar azot bien pou afront bann pèryod de shyass. Mi kite azot rofléshi la dsi é ni artrouv pli d’van. Sipétadyé !