Mi koné pa si zot la déza partissip in finérayeri — mi yèm bien mo-la pars mwin l ’antann sa dann shanté Madina par Bénoite Boular épi Maxime Laoppe — é mi apréssyé dë moune-la la fé in shanté dsi lantèrman, pars mi pé dir azot, mi apréssyé k ‘i anparl la mortalité dann in gayar séga, in produi la kiltir réyonèz.

Astèr lo barbo, kossa sa i lé ? Pou ma par mwin lé fine oir sa dovan simtyèr kan in famiye lo défin i distribyé in kou d’sèk pou lo bann partissipan lantèrman. La plipar d’tan néna in boutèye lo ronm dann tante kouvèrt épi lo pti vèr k’i sava avèk pou distribyé lo lèv-tète an konsolassion..

Mé barbo la pa arienk lo kou d’sèk sé galman lo pti ropa pou romèrssyé bann zintime la bien antèr lo défin é l’amontr zot solidarité avèk la famiye é sa sé in n’afèr inportan pou la famiye, pou la sossyété, anfin pou toute sak i mark zot solidarité avèk la famiye lo défin é mèm avèk lo défin li mèm.

Alé ! Mi kite azot rofléshir la dsi é dsi lo barbo konm in lakt inportan dann lakonpagnman pou in moune i sava l’ote koté d’la vi. Ni retrouv pli dvan, sipétadyé…

Justin