Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi koné pa si ou la suiv lo problèm « Lo Burkini ». Mi pans ke non pars zot, bann rouj zot i intérès arienk bann gran problèm, bann gran késtyon. Donk in sinp késtyonn kostime do bin sa i pé pa intérès azot sa. Poitan sa l’apré fé déga dann la Frans é sirman dann d’ot péi ankor. Donk, olèrk mète in mayo d’bin konm toulmoun ala ké bann fam mizilman la déside port in burkini. Kosa i lé sa ? Sa sé in linz de bin i kashyète in bone parti d’lo kor, mé k’i amont rosi ké ou la pa in fanm oksidantal normal. Rozman bann mèr, in pé partou, la désid défann in n’afèr konmsa é moin pèrsonèl, moin lé dakor avèk zot. Tok ! Pran sa pou toi !

Justin la fé pou répons :

Matant moin na konm l’inprésyon ou i intérès aou dé shoz lé inportan zordi. Ala k’in kostime de bin i atir out l’atansyon. Romark la pa la vot solman mé sète in bon pé d’moun dann bann éstasyon balnéèr. Moin, sa sé in n’afèr i shoke pa moin. Pou koué mi di sa, Pars kan bann madam la mète mayo in pyès zot la pa domann amoin si moin lé dakor. Kan zot la désid mète in bikini, zot la pa konsilt amoin. Kan la désid mète lo monokini, moin la pa vot ni pour ni kont sa. Astèr bann mizilmane i désid mète in zoli kostime do bin i apèl burkini : zot i domann pa mon n’akor. Mé si l’avé domann amoin mon avi moin nora plas amoin dann kan la libèrté konm mi pans moin la touzour fé... Lé vré k’in pé i alime in pétar, mé mi pé dir azot d’avans sé kaziman in pétar mouyé. Tok ! Pran sa pou ou.