Mi antann dann radyo, in rali l’oto l’apré done paké. Lo komantatèr i apèl Patrik. I fo antann ali roul son bann kozman. Dizon lo shèf sé li, lo shanpyon sé li... talèr li-mèm le loto, son motèr, lo rannman, lo ronronman é toute lo tranbléman. In rali l’oto, dann in péryode konm ni lé, dann in péi i produi pa in grin lésans... dann in péi domin l’ésans i sava rogoumanté. Dann in péi i lite konm li gingn kont la polisyon.

Informasyon majèr : in loto la pa pointe an son tan ! Informasyon majèr : nana in pilote la manj lo lion. Informasyon ordinèr : Patrik-la, sa la pa in dénomé Michel Vergoz. In shanpyon la protéksyon la natir, vi k’in parti ékolozis la domann vote pou li dézyèm tour zéléksyon réjyonal. Mi domann amoin zordi ankor pou kossa, vi k’lo parti ékolozis, li-mèm, li done ali lo tite shèf an tète la protéksyon l’anvironman. Mi pans, avèk lo dézord bann bébète loto i fé, avèk toute gaz i fé l’éfé d’sèr i arzète dann l’èr, avèk toute loto d’moun i sava oir lo z’afèr, la natir i doi zète bien protéjé. Arzout èk sa, bann bébète loto i travèrs an long, an larj lo park nasyonal lé-o : in vré régal pou in patrimoine rokoni par l’INESCO, lo piton, lo sirk é lo ranpar.

Aprésa, i pé touzour vote kont lo tram-train, kont la route tamarin, kont la rout litoral kat voi, kont l’énèrzi zéotèrmik, pars toussa i fo mète ansanm. Toussa pou dir, in pé i s’anfou nout natir, i s’anfou l’éshofman klimatik déssi la tèr ; Tanpir pou bann zil lé tro ba pou tir lo bout né kan nivo la mèr va goumanté, tanpir pou l’moun sar blizé kite zot péi. Provi k’zot nana zot vroum-vroum, provi k’zot nana zot bolide. Boudikont, konm in pé i di, apré moin lo déliz.

NB : Patrik, alias Michel, i pé, si li vé, èm son dada, la kours loto, mé i fo ète in pé koéran avèk out bagou dann Konsèy réjyonal, dann télé épi dann zournal. I fo ète in pé koéran avèk sak out parti i propoz. Mèm shoz pou bann protéktèr la natir patanté par zot mèm.

Justin