Apré rokin la mèr, ala ké rokin la tèr l’arivé !

28 séptanm 2016, sanm Justin

Matant zélida la ékrir Justin :

Mon shèr nové, mon spès salté, rouj-de-fon dovan l’étèrnité mi pans ou la antann la réjyon i vé libèr la tèr rényonèz par raport lo park nasyonal. Di pa moin, vi koné pa lo tor ké lo park nasyonal l’apré fé demoun La Rényon, a komansé par bann pti propriyétèr. Di pa moin ou la pa antann demoun apré ésplinn de sa ! Di pa moin ou i koné pa linzistis té i règn dann park nasyonal-la dopi in bon koup de tan. An touléka sa lé fini pars mé syé didier la antame in prosédir pou déklas lo park : pou transform sa an park réjyonal. Sak lé pa kontan, li pran konstan é tanpir pou li. Tok ! Pran sa pou toué !

Justin la fé pou répons :

Mon vyé matant k’i koz touzour la boush rouvèr. Ou i sava in pé vit an bézogn ! In klasman konm park nasyonal, sa i mète lo tan é nou rényoné ni koné kékshoz. In klasman par l’unesco, sa i fé pa an in zour é tout sak la travaye la-dsi i koné bien koman sa i éspas. In déklasman kroi pa sa i fé toutsuit pou toutsuit. Nana ankor pou ralé avann arivé !

Sak konsèy réjyonal i vé fé, sé in l’étid pou tash moiyin déklas lo park nasyonal, mé in l’étid solman k’i doi kout 50000 euros. Mé lo mové z’abitid mésyé Didier i arpran lo dési é moin la poin la plas pou ardi kèl déga so ga-la la fine fé dann La Rényon dopi 2010. Avèk konm konplis parti sosyalis épi d’ot ankor ou i koné fout pa kosa zot i pans pou vréman...

Zordi i paré ké li vé libèr la tèr rényonèz é lé posib k’in pé i aprésyé son bagou. Moin non ! Pars mèm si dopi dé zour li lé dann la politik li la fine fé d’déga é li arète pa pars li na sa dann san, dann son mové fon. Arzout èk sa tout sak i suiv ali i vé arienk in n’afèr : fé l’arzan, lo plis posib ! gonf z’ot pla lo plis posib galman.

Lo pti kréol i kroi sa lé bon pou li, mé malorozman, mi san déza, in pé va rogrète z’ot konfyans dann mésyé Didier Robert. Pa zordi, pa domin mé san tardé. Ziska zordi nou l‘avé rokin la mèr, astèr ni sa oir bann rokin la tèr arivé. Tok ! Pran sa pou ou !

Padport

Signaler un contenu

Inn modékri, inn ti lavi, inn komantèr ?


Témoignages - 80e année

La pès kabo

5 juillet, par Christian Fontaine

Kan i ariv Novanm-Désanm-Zanvié, domoun i réziste pi ek la salèr. Zène-zan i mars dann somin, zène-fi i roul an dékolté ; sétaki i rod in manir po (…)


+ Lus