I tard pa, nora d’gou pou bann marmay kan bann z’amontrèr va fé la grèv. Bann marmay v’alé konm kan zot i sava lékol. Solman nora poin bann z’amontrèr, nora bann zamizèr : va zoué, va aprann in pti gui-guine, va manzé... pou sak lo nom lé marké la kantine. Sar éstra pou vréman...

Pandan s’tan-la, kossa z’ot famiy va fé ? Si zot lé amontrèr, zot nora moiyin dépoz z’ot marmay lékol épi alé manifésté. Aprésa, lo soir, z’ot nora ka dor déssi z’ot dé zorèy akoz lo marmay sar fine fé son dovoir lékol maron... Si lo bann paran la pa amontrèr, i shanj pa arien : poz marmay lo matin, artourn trap ali mèm èr k’dabitid...

Lé ga ! Kroi pa moin l’apré anbras gouvèrnman déssi la bèk pou félisite ali pou son bon désizion ! Non va ! Mon léspri la pa la èk sa la !

Mi domann amoin : Inn, si ninport de ki lé kapab okip zanfan dmoun, mèm si lé pa kalifié dann l’animasion, la pédagozi, la psikolozi marmay. Kossa zot i anpans zot ? Dé, kissa va pèy sa kan gouvèrnman nora pèrd son klé kofor ? Amorsé lé bon, pou léssans li sifone bak lé z’ot ! Alor, konm di lo patoi, i fo dmann Roland Garros pou péyé ? Si plas barasoi, son min lé touzour dann son posh, li tir pa zamé. Li pèy pa non pli !

Justin